کیلے کے فوائد

کیلے کے فوائد

کیلا وہ پھل ہے جو آپ کو صحت اور طاقت بخشنے آیا ہے۔یہ آپ کے لئے ایک پر فیکٹ پھل ہے جو کہ آپ کی زندگی بدل سکتا ہے ۔کہیں بھی کسی بھی وقت اس کو مختلف قسم کے کھانے اور پینے میں استعمال کیا جا سکتا ہے۔اگر آپ اپنے بچے کا دودھ چھڑا نا چاہ رہی ہیں تو بھی یہ آپ کے بچے کے لئے بہترین اور بھرپور غذا ہے،اگر آپ اپنے لئے فوری توانائی والی ڈرنک بنانا چاہتے ہیں تو بھی کیلے میں دودھ مکس کریں ،بلینڈ کریں ،لیجیے آپ کی توانائی سے بھری ڈرنک تیار ہے۔یہ پکنک اور پارٹیز وغیر ہ کے لئے بھی بالکل پر فیکٹ پھل ہے جس کو چھیلنا ،کھانا آسان ہے اور اس کو کھانے میں آپ کے ہاتھ پیر بھی خراب نہیں ہوتے ،اس کو برتنا،استعمال کرنا آسان ہے۔ویسے بھی اس کی غذائیت کے باعث اس کا پھلوں میں الگ ہی مقام ہے ۔اس میں بہت زیادہ مقدار میں پوٹاشیم موجود ہوتا ہے جس کی وجہ سے یہ بے شمار بیماریوں سے بچاتا ہے۔آیوڈین کی کمی کو دور کرتا ہے ،پٹھوں کو مضبوط کرتا ہے،اس میں ٹھوس غذائیت زیادہ اور پانی کم ہوتا ہے۔

آپ کے دل کا بہترین دوست:

اس کو اگر پوٹاشیم کا سپر فروٹ کہا جائے تو بے جا نہ ہو گا ۔کیلا ہائی بلڈ پریشر کو کم کرنے میں بہت کام آتا ہے ۔یہ اسٹروک اور ہارٹ اٹیک سے بھی بچاتا ہے ۔بلڈ پریشر کو اعتدال میں رکھنے کے لئے ڈاکٹرز نہ صرف نمک (سوڈیم)کے کم استعمال کا مشورہ دیتے ہیں بلکہ ہائی پوٹاشیم لینے کی بھی تاکید کرتے ہیں ۔کیلے میں پوٹاشیم کے علاوہ فائبر،وٹامن سی،اور بی 6بھی پایا جاتا ہے جو کہ دل کی صحت کے لئے بہترین ہے۔

صحت بخش توانائی کا ذریعہ:

آپ نے یہ محسوس کیا ہو گا کہ جب بھی آپ کیلا کھاتے ہیں آپ کو اپنے اندر طاقت و توانائی محسوس ہو تی ہے ۔یہی وجہ ہے کہ جو لوگ اپنی خوبصورتی اور فٹنس کو بہت اہمیت دیتے ہیں وہ عموماً اپنے جم اور ورک آؤٹ سے پہلے دو کیلے کھا لینا پسند کرتے ہیں تاکہ ان کی انرجی ورک آؤٹ کرتے ہوئے کم نہ رہے اور بلڈ شوگر لیول بڑھا رہے۔کیلا کھانے سے ورک آؤٹ کے دوران پٹھوں کے کھنچاؤ یا اس میں بَل پڑ جانے کی بھی شکایت پیدا نہیں ہوتی۔اس کے علاوہ رات میں سوتے ہوئے جن لوگوں کی نَس چڑھ جاتی ہے اس سے وہ شکایت بھی دور ہوجاتی ہے۔

خوش رکھنے والا پھل:

کیلا آپ کے ڈپریشن کو بھی دور کرتا ہے اور آپ کو خوش ہونے میں مدد دیتا ہے۔کیونکہ اس میں ٹرپٹوفن پایا جاتا ہے۔جو کہ سیروٹونن میں تبدیل ہو جاتا ہے جو کہ موڈ کو خوشگوار بنا نے کا نیورو ٹرانسمیٹر ہے۔اسی لئے آپ کیلا کھا کر اپنا موڈ بھی خوشگوار کر سکتے ہیں۔اس کی وجہ یہ ہے کہ یہ پھل آپ کی بلڈ شوگر لیول کو بڑھا کر آپ کا ذہنی دباؤ ختم کرتا ہے ۔اس کے علاوہ جن حاملہ خواتین کو صبح اٹھ کر طبیعت بوجھل اور خراب لگتی ہے ان کو بھی کیلا کھانے سے افاقہ ہوتا ہے۔

ذہنی دباؤ سے نجات:

پوٹاشیم کی مناسب مقدار لینے سے آپ کی دل کی دھڑکن صحیح رہتی ہے۔اور اس کی وجہ سے آپ کے دماغ کو آکسیجن ملتی رہتی ہے ۔اپنے جسم کے پانی کے توازن کو درست رکھنے اپنے نظامِ انہظام کو صحیح رکھنے میں بھی یہ مددگار ہے ،اس کے علاوہ اس کی وجہ سے آپ کے ذہنی دباؤ میں کمی آتی ہے اور آپ اچھا محسوس کرتے ہیں۔

اپنے آپ کو متحرک اور اسمارٹ بنائیں:

کوشش کریں کہ کسی امتحان یا پریزینٹیشن پہ جانے سے پہلے کیلا کھا کر جائیں ،کیلے میں موجود پوٹا شیم لیول آپ کو الرٹ،تیز،متحرک اور اسمارٹ رکھتا ہے آپ کے سوچنے سمجھنے کی صلاحیت بہتر ہو جاتی ہے۔اور آپ اپنا بہترین کام پیش کرنے کے لئے تیار ہو جاتے ہیں ۔

آپ کے پیٹ کا بہترین محافظ:

کیلے میں موجودپیکٹن اورہضم کرنے والے انزائمز آپ کے جسم سے تیزابیت اور بھاری غذا جو کہ ہضم ہونے میں پریشان کن ہو ،ایسی تمام چیزوں کو کیلے میں موجود اجزاء جسم سے نکال باہر کر دیتے ہیں ۔قبض یا دست کی سورت میں یہ جب آپ کے جسم کو پریشان کرتے ہیں تو کیلا ان دونوں صورتوں میں اس کو ٹھیک کر دیتا ہے۔یہ نہ صرف آپ کے ہاضمے کو درست کرتا ہے بلکہ آپ کے الیکٹرولائٹس کو بھی محفوظ رکھتا ہے۔ایک قدرتی پری بایو ٹک اور اینٹیسڈ کے طور پر بھی کیلا دوست بیکٹیریا کی حفاظت کرتا ہے اور معدے کے السر،سینے کی جلن اور تیزابیت سے بچاتا ہے۔

ڈائیٹ غذا:

اگر آپ اپنے وزن کو کم کرنا چاہ رہی ہوں لیکن آپ اپنے میٹھے کی طلب پر قابو نہ پا سکیں تو آپ کیلے کی مٹھاس پر آجائیں یعنی کیلے سے اپنی یہ طلب پوری کریں،یہ کم کیلوری پھل ہے لیکن اس میں پانی کم اور فائبر زیادہ ہے جس کی وجہ سے آپ کا ہاضمہ کچھ سست ہوجاتا ہے ۔اور اسی بناء پر آپ کو بار بار بھوک نہیں لگتی اور کھانے کی طلب کم ہوتی ہے

نظر کی تیزی:

وٹامن اے اوربیٹا کیروٹین کا بنیادی ذریعہ ہونے کی وجہ سے کیلاآپ کی آنکھ کے قرنیہ کی روشنی کو درست رکھتا ہے اور آپ کی نظر کو بھی صحیح رکھتا ہے۔اس کو کھانے سے آپ کی نظر تیز ہوتی ہے ۔

ان سب خصوصیات کو پڑھ کر پتہ چلتا ہے کہ کیلے میں قدرت نے کتنی ساری غذائیت پوشیدہ رکھی ہے ،یہ ایک سستا پھل ہے جو کہ ہر ایک کی پہنچ میں ہے(رمضان کے علاوہ)یہ ہماری پوری جسمانی صحت کے لئے ایک اہم پھل ہے جس کے اہم غذائی اجزاء کینسر کی بھی روک تھام کرتے ہیں ۔اس میں موجود فائبر کی بڑی مقداربڑی آنت کے کینسر سے محفوظ رکھتی ہے۔اس میں موجود آئرن جسم سے ہیموگلوبن کی کمی کو پورا کرتا ہے ،اس میں موجود کیلشیئم ہڈیوں کو مضبوط کرتا ہے ،کیلا کھانے سے گرمیوں کے موسم میں جسم ٹھنڈا رہتا ہے ،ا س کے علاوہ بخار ہونے کی صورت میں بھی یہ جسمانی حرارت کو کم کرتا ہے۔کیلے کے بارے میں کہا جا سکتا ہے کہ یہ قدرت کی طرف سے ہمارے لئے ایک انعام ہے ،اس کی بھرپور غذائیت جسم میں توانائی کی کمی کو دور کر کے اسے صحت اور تندرستی (health and wellness) عطا کرتی ہے ۔یہ غریب اور امیر دونوں میں یکساں مقبول پھل ہے۔اس لئے کہا جا سکتا ہے کہ کیلا صرف بندروں کی غذا نہیں ہے۔

کیلے کے بے شمار فوائد

قدرت نے تمام موسموں کے پھلوں کو ان کی افادیت کے ساتھ انسان کی جسمانی ضروریات کے طور پر پیدا کیا ہے جو نہ صرف انسان کے جسم میں مختلف وٹامنز کی کمی کو پورا کرتے ہیں بلکہ کئی پھلوں میں غذا کے ساتھ جسم میں موجود جراثیم سے لڑنے کی بھی بھر پور صلاحیت ہوتی ہے یا یوں کہہ لیں کہ موسم کا ہر پھل ذائقے کے ساتھ انسان کے لئے دوا بھی ہے۔بر صغیر میں آم کے بعد سب سے زیادہ رغبت سے کھایا جانے والا پھل کیلا ہے ۔غذائی اعتبار سے کیلے کی افادیت کا انکار نہیں،کیونکہ یہ توانائی سے لبریز پھل ہے ،جس میں وٹامن اور معدنیات کا خزانہ پوشیدہ ہے ،یہ ایک ایسا جادوئی پھل ہے جو انسانی جسم کو پلک جھپکتے ہی توانائی فراہم کرتا ہے ،دیگر پھلوں کے مقابلے میں یہ ایک زود ہضم غذا ہے جسے شیر خوار بچوں کی ابتدائی خوراک کا اہم جزو سمجھا جاتا ہے ،کیلا اگر بچوں کو کم عمری میں استعمال کروایا جائے تو وہ بہت جلد صحت کے اعلٰی معیارتک پہنچتے ہیں ۔جبکہ بڑھتے ہوئے بچے ہر روز ناشتے میں کیلا کھانے کے بعد ایک گلاس دودھ پینے کی عادت اپنالیں تو ان کا وزن بھی برھنے لگے گا اور جسمانی طاقت بھی حاصل ہوگی۔

کہتے ہیں کہ کیلا قدیم ترین پھل ہے جو زمانہ قبل از مسیح سے زیرِاستعمال ہے ،سکندرِ اعظم نے اسے دریائے سندھ کی وادی مین کاشت ہوتے دیکھا تھا مگر اب یہ دنیا بھر کے کئی ممالک کے میدانی علاقوں میں کاشت کیا جاتا ہے ۔اطباء کی رائے کے مطابق کیلا گرمی ،سردی کے موسم میں معتدل اور دوسرے درجے میں تر ہے ،بعض کے نزدیک گرم تر ہے،بر صغیر پاک و ہند میں اس کی کئی اقسام کاشت کی جاتی ہیں کیلے کی ہر قسم کا اپنا الگ ذائقہ (Taste)،حلاوت،غذائی خصوصیت اور قوت بخش معیار ہوتا ہے ۔سائنسی تجزئیے کے مطابق6کیلوں میں 450حرارے ہوتے ہیں۔

کیلے میں 80فیصد غذائی اجزاء ہوتے ہیں،اسمیں تقریباً3/4 حصہ پانی اور 1/5 حصہ شکر اور باقی نشاستہ ،حل پذیر ریشہ،معدنیات اور حیا تین ہوتے ہیں ،نشاستہ زیادہ ہونے کی وجہ سے کیلا کھانے سے کام کرنے کی صلاحیت میں اضافہ ہوتا ہے۔اس میں گوشت بنانے والا جز و نائٹروجن زیادہ ہوتا ہے ۔کیلے میں کیلشیئم،میگنیشئم،فاسفورس،گندھک ،لوہا،اور تانبا پایا جاتا ہے۔طب نبوی ﷺ کے مطابق کیلا عمدہ پھل ہونے کے ساتھ ساتھ ایک اچھی دوا بھی ہے،یہ جسم میں وٹامن سی کی کمی کوپورا کرتا ہے ،طاقت اور خون پیدا کرتا ہے،گردوں کو طاقت دیتا ہے،جگر کے لئے مقوی ہے،گلے کی خراش میں اس کا استعمال مفید ہے ،جسم سے زہریلے مواد کو باہر نکالتا ہے ،کھانسی کے لئے بھی مفید ہے،جبکہ پیچش کے لئے اکسیر ہے،یرقان میں بھی فائدہ پہنچاتاہے۔تیزابیت دور کرتا ہے،اس لئے معدہ کے لئے مفید ہے ۔پیاس اور دل کی بیماریوں کے لئے بھی فائدہ مند ہے،پیچش ،مروڑ،بچوں کے دستوں میں اور کمزور بچوں کے لئے جن کا وزن کم ہو انہیں کیلا دودھ کے ساتھ دینا چاہیے۔کم مقدارمیں کھانے کی صورت میں باعث قبض،اور زیادہ کھانے کی صورت میں قبض کشا ہے ،جسم کو موٹا کرتا ہے ،شوگر کے مریض کم کھائیں ،کیلا کھانے کے بعد فوراًً پانی نہ پیءں اس سے بلغم پیدا ہوتا ہے ،پیچش اور دست کے دوران کیلا دہی میں ملا کر کھائیں۔

کیلے کے ساتھ ساتھ اللہ نے کیلے کے درخت میں بھی دوا کے اثرات رکھے ہیں۔کیلے کے تنے میں موجود پانی سے پیٹ کے کیڑے ہلاک ہوتے ہیں،اس کی جڑ بھی بڑی کارآمدہے،جس سے طبیب اپنے مریضوں کاعلاج کرتے ہیں ،کیلے کی ایک خوبی یہ ہے کہ دن کے ابتدائی حصے میں اس کا استعمال جس قدر کارگر ہے اتنا شام یا رات کو نہیں ،لہذا بہتر ہوگا کہ ناشتے کے اوقات میں کیلا استعمال کیا جائے۔

کبھی آپ نے کیلے کا سالن کھایا ہے ؟جی ہاں کچے کیلوں کا سالن لذیذ و مزیدار بنتا ہے کچے کیلے کو سالن کے طور پر پکا کر کھانے سے جسم میں نہ صرف چستی رہتی ہے بلکہ یہ جسم کی تھکن دور کرنے میں بھی مددگا ر ثابت ہوتا ہے۔کیلا کھانے سے انسان بہت سی بیماریوں سے بچ سکتا ہے۔جن میں ذہنی تناؤ،بلند فشارِخون ،فالج ،ذہنی صلاحیتوں میں کمی شامل ہیں۔غذائی ماہرین کا کہنا ہے کہ کیلا ایک ایسا پھل ہے جس میں انسانی صحت کے لئے بیش بہا فوائد شامل ہیں جو پھل کے ساتھ ساتھ دوا بھی ہے ۔طبی ماہرین کا کیلے کے حوالے سے کہنا ہے کہ کیلے میں تین چوتھائی حصہ پانی ہونے کی وجہ سے چھوٹے بچوں کے لئے کیلے کا استعمال ان کی صحت کا ضامن ہے،اس لئے بچوں کو دودھ کے ساتھ کیلے کا استعمال ضرور کرائیں۔الغرض کیلا پھل کا پھل ہے اور دوا کی دوا ہے۔اس کے استعمال کو اگر معمول بنا لیا جائے تو پھر کوئی وجہ نہیں کہ کوئی بیماری آپ کے قریب بھی پھٹکے۔ کیلا وہ پھل ہے جو آپ کو صحت اور طاقت بخشنے آیا ہے۔یہ آپ کے لئے ایک پر فیکٹ پھل ہے جو کہ آپ کی زندگی بدل سکتا ہے ۔کہیں بھی کسی بھی وقت اس کو مختلف قسم کے کھانے اور پینے میں استعمال کیا جا سکتا ہے۔اگر آپ اپنے بچے کا دودھ چھڑا نا چاہ رہی ہیں تو بھی یہ آپ کے بچے کے لئے بہترین اور بھرپور غذا ہے،اگر آپ اپنے لئے فوری توانائی والی ڈرنک بنانا چاہتے ہیں تو بھی کیلے میں دودھ مکس کریں ،بلینڈ کریں ،لیجیے آپ کی توانائی سے بھری ڈرنک تیار ہے۔یہ پکنک اور پارٹیز وغیر ہ کے لئے بھی بالکل پر فیکٹ پھل ہے جس کو چھیلنا ،کھانا آسان ہے اور اس کو کھانے میں آپ کے ہاتھ پیر بھی خراب نہیں ہوتے ،اس میں بہت زیادہ مقدار میں پوٹاشیم موجود ہوتا ہے جس کی وجہ سے یہ بے شمار بیماریوں سے بچاتا ہے۔آیوڈین کی کمی کو دور کرتا ہے ،پٹھوں کو مضبوط کرتا ہے،اس میں ٹھوس غذائیت زیادہ اور پانی کم ہوتا ہے۔